民建聯立法會議員葛珮帆去咗以色列考察，到訪當地嘅海水化淡廠，「葛博士」視察完畢，突然喺facebook有感而發，話香港要增加淡水資源供應，「減低對東江水源的依賴，實在刻不容緩。」曾經叫港人「飲水要思源」、要諗吓邊個供水畀香港嘅民建聯葛博士，唔知係咪喺度離間緊兩地人民之間嘅感情，竟然提出減少依賴內地嘅東江水？有網民質疑葛博士係咪喺度搞緊港獨。梁振英反對港獨，葛博士反對「港獨」嗎？
曾說「飲水要思源」
葛博士今次係參加由財政司司長帶領嘅商貿代表團訪問以色列，唔知係咪暢遊異國時太開心，唔記得民建聯喺東江水嘅堅實立場。葛博士話，香港要減低依賴東江水，仲話「期望政府能把好關，讓香港有穩妥的供水，市民未來不用捱貴水。」葛博士嘅意思，係咪即係話將內地東江水輸港，講成係無良奸商？嗱！同大家重溫吓，「飲水要思源，評論要公道，這是做人的基本良知。」呢句金句係民建聯葛珮帆對支持東江水供港嘅有力註腳。
民主派以往要求搞海水化淡、減少輸入東江水等，民建聯都反對。香港本土嘅毛孟靜曾經喺立法會提出「港人港水」議案，葛博士都係投反對票。如今呢個立場，難怪令唔少人都覺得好奇怪，甚至有人覺得葛博士好無恥。
李八方