中央政府前年11月起，重新接受部份民主派人士嘅回鄉證申請。身兼民主黨中委同支聯會常委嘅張文光，上年4月成功申請回鄉證，同年6月到過亡父家鄉台山，係佢28年來首次到訪內地。
「係上年嘅事」
親建制網媒「橙新聞」上個禮拜五就突然有篇題為「領回鄉證首遊絲路 張文光手術台上了解內地新面貌」嘅報道，話張文光「今年9月」再次返內地旅行，去到甘肅瓜州騎駱駝時，突然感到上腹痛，其後證實患上膽囊炎。
報道話，張文光問咗香港醫生意見後，就喺瓜州嘅醫院接受咗兩個鐘手術，因為粒膽石太大，用微創手術攞唔到出嚟，要先打碎先攞得走。張文光手術成功後，留醫6日，就坐飛機返港，事後都讚瓜州嘅醫生同醫院好專業。𠵱家同太太喺美國旅行嘅張文光，噚日接受八方查詢就話，呢件事其實發生喺上年9月，話當時返港半個月後，手術傷口已經好番晒，多謝大家關心咁話。