亞洲防盲基金會噚日喺灣仔修頓場館舉辦「看不見的體驗2018」，請嚟郁啲就出律師信告人誹謗嘅前特首梁振英，叫佢戴上眼罩體驗幪眼射龍門。雖然689一直俾唔少市民話佢最叻搬龍門，不過到佢射波，就冇人敢搬佢個龍門！由於689早排發律師信告理大學者鍾劍華誹謗，引嚟港大法律學院首席講師張達明喺facebook同689及其支持者筆戰，傳媒見689現真身，梗係想問佢兩句，不過佢就只係玩射龍門，到離場一直迴避傳媒提問，令成班記者白跑一次。
講返看不見的體驗，呢個係阿拉丁足球訓練學校首個推廣傷健共融嘅大型公益慈善活動，目的係希望透過模擬視障足球比賽同多種活動體驗，喚起公眾對視障足球嘅關注，從而改善視障人士生活，推動傷健共融。活動所有收益扣除支出後，將全數捐贈畀亞洲防盲基金會，為視障人士提供服務。