本欄以前講過嘅銀行見習生Y，眨吓眼已過咗五年，開始有毛有翼嘞。左丁山以銀行見習生過來人身份，勸告佢唔好急於搵工跳槽（加人工吖嘛），而係要有耐性在銀行見識，考齊當今之沙紙要求，叫佢用五年時間，考到風險管理（Risk Management）資格試及香港銀行學會資格試（即相當於當年左丁山考到之倫敦AIB），先至好望東望西。
見習生Y自中大經濟系畢業，新亞師弟也，一旦專心考資格試，肯定冇失拖，卒之考齊，成為專業銀行行員；左丁山叫佢不妨考埋CFA，預備他日轉行做芬佬（基金管理），點知呢位已經升咗做「助理副總裁」嘅準賓架話：「有金融機構請我去杜拜返工，我暫別香港去闖吓天下先，你反唔反對？」後生仔有此志願，點會反對呀，去杜拜當然係好事，杜拜係中東金融中心，伊斯蘭金融重鎮，歐美高手雲集，有機會去杜拜打工，對前途肯定有益，未來 CV上加添色彩。講起嚟，2012年Y仔讀完領袖訓練課程，有兩個實習機會，一個係去北京，一個係去孟加拉微型銀行，Y仔問到，左丁山叫佢一於去孟加拉捱世界，北京隨時可以去嘅啫，孟加拉就要在適當時候搭到天地線先至得，機會難逢也。極少香港仔大學生讀完碩士會去孟加拉嘅，Y仔肯去捱幾個月三餐咖喱，晚上在酒店房間與老鼠、大蟑螂共處一室（老鼠趕極唔走，到Y仔行李搵食物），證明有相當勇氣，人哋肯請佢去杜拜，唔知係唔係欣賞佢曾經有捱苦經驗呢？男仔年青時叫做吃少少苦頭，對前途有益㗎！
講起老鼠入侵酒店房間，英國足球名宿麥拔（Gary Mabutt），今年57歲，曾是熱刺中場大將，入選英格蘭隊16次，係一名硬漢，最近（兩星期左右）對BBC講，佢與女兒到南非旅遊，晚上因事扎醒，發覺一隻大老鼠正在佢腳底食佢嘅肉，為之大驚失色，用物敲打，趕走老鼠，只見一隻腳趾已經被咬到見骨，腳板底穿咗一個窿。點解佢之前無知覺呢？皆因麥拔16歲已有糖尿病（Type 1），醫生叫佢放棄足球，佢堅持唔肯，每日為自己打胰島素針，堅持上陣作賽，而且踢法勇悍。但既有糖尿病，多年來雙腳已失去知覺，唔識痛，故此睡覺時被老鼠吃自己腳趾及腳板亦不知道。知道後，當然係急救，跟住飛返英國做手術，呢個真實故事可以警惕強國人，去非洲投資做生意，晚上慎防老鼠！