上月結婚嘅新民黨立法會議員容海恩，究竟腹中是否有塊肉、會唔會成為首位在任期間懷孕嘅議員，一直係茶餘飯後話題。適逢噚日新一季《城市論壇》討論男士侍產假3日加到5日、女士產假由10星期加到14星期嘅議題，出席嘅恩恩豬終於忍唔住，節目尾段自爆：「毫（如）無意外，明年我係需要有產假！」
盼立會通融
其實節目一開始，主持蘇敬恆已經有意無意問佢「請問𠵱家台上係唔係有6個人？」唔係盲嘅都會數到，台上4位嘉賓連主持有5個人，呢條問題係間接問恩恩豬係唔係有喜。恩恩豬俾呢條突擊問題窒咗道氣，諗一諗之後答：「到時你咪知！」
唔知係咪因為俾蘇B回敬咗一句「個肚係呃唔到人」，恩恩豬喺節目尾聲誠實披露自己明年好大機會需要有產假。喺直播節目宣佈大喜訊，自然引來全場哄動，連針鋒相對嘅蘇B都立即恭喜一番。之不過恩恩豬話鋒一轉，就提到立法會係冇產假制度，希望立法會作為先行者，容許議員有一定日數嘅產假，「希望唔好話我哋（因放產假）缺席！」又話如果產假加到14星期，打工仔嘅福利多咗，歸屬感更大，對公司係一件好事。