今夏帶領冰島（藍衫）出戰世盃決賽周嘅牙醫主帥賀基姆臣，早前決定功成身退，交由前瑞典教頭咸姆接手。但係呢隊冰島似乎冇咗昔日嘅拼勁同鬥志，喺上周六嘅歐洲國家聯賽作客瑞士，慘吞對手半打光蛋輸足0:6，睇嚟呢隊新冰島需要唔少時間重建。
瑞士今場主場出擊，格列沙加、梳頓沙基利等球員照舊正選，合作性十足。上半場13分鐘，左翼史堤芬蘇巴接應列卡度洛迪古斯地波傳送，隨即用左腳勁射破網；之後輪到沙基利表演時間，先喺上半場23分鐘，喺右路開罰球使出招牌左腳勁射，冰島門將荷杜臣雖然撲出，但都畀防中薩卡利亞門前執雞，後者拎到喺國家隊嘅首個入波。到下半場53分鐘，沙基利再次喺右路重施故技，左腳勁射開出罰球，嗰波勁度十足，途中冰島守將輕輕頂到個波，但都無阻個波直接破網，令瑞士領先至3:0。兵敗如山倒嘅冰島，隨後再於67、71及83分鐘，畀施費洛域、阿耶迪同埋美密迪破網，最終冰島喺世界盃後，首戰歐洲國家聯賽即慘吞六蛋。