西環今年4月搞過「欽點」獲邀人士先可入場嘅「開放日」後，噚日又喺敬師日前邀請近600名香港教育工作者入中聯辦參觀兼聽副主任演講。噚日天公都算造美出返少少太陽，八方同事早過唔少建制派傳媒同嘉賓到場排隊，可惜到場登記時就俾西環職員以「我哋冇邀請《蘋果》」為由拒絕採訪。
入場人士拒拎大公文匯
有消息話唔少傳媒早前都收到西環邀請，只有獲邀傳媒及獲發門券嘅教育界人士先可以入場，但身兼幼稚園校長嘅民記南區區議員麥謝巧玲一到場話「我唔記得帶飛」，即獲職員主動「補飛」，安排似乎相當兒戲。其間有大公文匯傳媒集團職員向入場人士派發《文匯報》同《大公報》，但唔係個個都肯攞。
到咗朝早9點左右，近百名教師排隊進場，唔少教育界親建制人士都有現身。而一班工人就唔知攞景定贈興，喺西環閘外花槽大肆動土兼示範「修皮」，將花槽上嘅草皮鏟走再收埋喺垃圾袋運走。香港靈糧堂幼稚園校長陳曾建樂進場前接受《蘋果》訪問時就話，覺得能夠多同中聯辦溝通係好事，話過去聽過中聯辦副主任譚鐵牛演講，佢「好想聽吓譚鐵牛講嘢，佢講嘢係好好聽」喎。
李八方
