英格蘭喺上周六嘅歐洲國家聯賽A4組比賽中，雖有效力曼聯嘅拉舒福特先開紀錄，但喺主場仍以1:2不敵西班牙，比賽中更有勞基梳爾頭部重創。呢名23歲曼聯後衞啱啱先走出傷患，難得事業有起色又再傷出，認真慘情。曼聯領隊摩連奴亦係比賽嘅座上客，但佢入場時仆親就淪為球迷嘅笑柄，前晚嘅比賽紅魔兵做晒主角，仲上演慘情之夜。
歐國聯畀狂牛反吸2:1
英格蘭今場續以三中堅應戰，由勞基梳爾出任左翼衞，拉舒福特同哈利卡尼組成雙箭頭。
開賽至第11分鐘，拉舒福特接應梳爾傳中喺遠柱射入。不過，英軍領先咗僅僅兩分鐘就被追平。西班牙由艾簡達拿底線回傳，沙奧尼古斯勁射破網追平1:1。之後英軍喺32分鐘因後防犯錯，走漏咗洛迪高摩連奴，佢接應艾簡達拿嘅罰球射入，西班牙反先2:1。下半場一開波，英軍再傳嚟壞消息，梳爾同對手相撞後頭部受創，要用擔架抬離場。呢名曼聯球員更一度昏迷不醒，不過之後佢透過社交平台報平安。下半場雙方再無進賬，英軍亦以一球之差落敗。
卡尼領金靴沖喜失敗
梳爾嘅受傷相信令摩連奴非常頭痛，因為梳爾喺開季四場英超都踢正選，更喺首場入波，表現唔錯。講起摩連奴，佢喺開賽前發生咗一段小插曲，就係佢喺行入球場時唔小心仆親，嚇親附近嘅球迷。呢個尷尬一幕就被網民拍低咗並上載至twitter，一眾網民就好抵死咁將佢同前阿仙奴教頭雲格喺機場仆倒一事相提並論，話佢哋越嚟越似。
另外，哈利卡尼亦喺開賽前高舉世盃金靴獎，不過佢就認為自己喺世界盃踢得唔夠好，並承諾會喺下屆交出更好嘅表現。英軍會喺周二同瑞士踢友賽，領隊修夫基承認球隊𠵱家唔夠人，會喺U21中揀一位球員填補梳爾嘅空缺。
