中國大舉援助非洲，豪擲六百億美元，借用內地網民慣用形容詞，這一趟，美國呆了！歐盟震驚了！日本恨死了！台灣哭了。真厲害，我的國！朋友M來電討論習主席點解咁豪氣咁大手筆，一揮手，便以銀彈600億投襲非洲。中共黨中央素來理論先行，做乜事都有十萬字起碼嘅說明，黨內理論家相信將有大量文章出台，為600億美元投資非洲作辯解及提出一大套長期戰略規劃理念。
與朋友M講講吓，又覺得習近平把中國放在世界舞台爭威風，與美國共治天下的話，爭取非洲似乎有啲理由。今日國際環境，正合曹操所講：今天下英雄，唯使君與操耳。去年特朗普訪京，習近平特別安排在故宮寶蘊樓與特朗普茶聚，規格超高，當時唔知有冇引用曹操之言呢，至於邊個係曹操，邊個係劉備，一味靠估。2018年，英國潰不成軍，歐盟已變成一盤散沙，國國有本難唸的經，日本自1989年一蹶不振，而中國乘時湧起，故此特朗普爛仔一名，罵通街，只係稱讚習近平係偉大朋友（a great friend），即使對中國出口美國貨物痛下殺手，對習近平從不出惡言。
非洲呢？歐洲殖民主義已完全退出，美國兵力集中於地中海及波斯灣一帶，保護沙特阿拉伯及美國石油利益，對非洲無力兼顧，因戰線太長也。列強無意逐鹿，中國正好往非洲填補空缺。非洲領袖，幾難搵到一位真正為國為民唔貪錢嘅，中國金錢當然大受歡迎。一個願派，一個願收，皆大歡喜啦，何志平涉嫌涉及之事，十幾年來在非洲小兒科到極。中國大灑金錢有乜回報呢？據CNN報導，埃塞俄比亞首都阿的斯阿貝巴近年大興土木，新建築物紛紛落成，全部係中國投資項目，中國建築招牌到處可見，呢啲咪係中資收成囉。據泰國民族報社論講中國贊助泰國興建高鐵之融資安排模式，鐵路沿綫左右兩旁40公尺範圍內嘅地係中國貸款之抵押品，所有工程設計物料材料及建造，由中國公司承辦，工人就由中國熟練技工為主。於是中國左手貸款，中資企業（右手）取得承辦報酬，最後邊一個償還貸款，泰國囉，民族報認為係不平等條約，要求停建。中國到非洲投資貸款援助可能亦係沿用呢一個模式，只要非洲國家唔會變成委內瑞拉，條數計得掂喎！