𠵱家自由身嘅37歲車路士傳奇隊長泰利，喺上周五接受英國《每日郵報》訪問時話，佢會繼續球員生涯，亦話自己收到四至五個加盟邀請，包括一間英超球會嘅邀請，但自己未做好決定。雖然曾有傳泰利會重返上季嘅球會阿士東維拉，甚至連去曼聯都有機；但意大利《天空體育》話泰利已去咗羅馬體測，或以180萬歐元（約1,600萬港元）年薪，加盟意籍教練卡里拉帶領嘅俄超球隊莫斯科斯巴達。
將來好想做領隊
泰利話本來想喺今夏完成阿士東維拉嘅合約後，就結束自己嘅足球生涯，但因為已故好友兼前車路士助教韋健士嘅一句說話，令佢改變主意。「我本來已有退役嘅打算，但韋健士曾對我講：『如果你覺得自己仲可以踢嘅話，就繼續比賽啦。』因為佢呢番話，我先有繼續踢嘅諗法。」雖然泰利話有四、五支球隊包括一支英超球隊對自己有興趣，但周六泰利喺ig上載咗坐飛機同抽血嘅相後，意媒就爆出泰利去咗當地體測，仲話泰利會出國揀去莫斯科踢波。
而訪問中泰利仲話將來想做領隊：「我想喺退役後擔任教練，我唔少好友都做咗教練，例如林柏特、謝拉特。摩連奴、韋健士、蘇拿，佢哋喺戰術、訓練中對我有好多啟發，摩連奴嘅體系、戰術筆記我𠵱家仲保留緊；蘇拿喺當初嚟車路士，教咗我好多防守嘅練習同技巧，令我變得更強。」同時，佢亦認為摩連奴可以帶領曼聯取得成功，認為佢只係需要更多時間，就可以將球隊帶上軌道。
至於現任車路士隊長加利卡希爾，都為自己嘅前途煩惱中，32歲嘅加利卡希爾同車仔仲有一年約，但喺新帥沙利麾下，車仔變陣踢番兩個中堅，卡希爾四場聯賽連一分鐘上陣時間都冇。據報佢話如果喺球隊嘅處境冇改善嘅話，一月可能離隊。早喺八月尾，當時有傳車仔批准卡希爾同土超勁旅加拉塔沙雷傾，但最後無疾而終。