荷蘭中場史奈達周四晚喺球隊主場2:1反勝秘魯嘅國際友誼賽後，正式退出國家隊，結束超過15年嘅國際賽生涯。
今仗取代原隊長華基爾雲迪積克戴上隊長臂章嘅史奈達，正選上陣踢咗62分鐘，佢退下火線後喺場邊同教練朗奴高文握手擁抱道別。比賽完結後，荷蘭足總為史奈達辦咗個別出心裁嘅告別儀式，喺荷甲阿積士主場、𠵱家改咗名叫告魯夫球場嘅正中央擺上一張梳化，並將周邊佈置得好似個客廳咁樣，然後安排史奈達同陪同佢出席儀式嘅家人，坐喺梳化度睇一眾戰友事前為佢拍嘅短片。史奈達其實早喺今年三月已經決定退出國家隊，故今仗可算係佢嘅告別賽。
荷蘭球迷亦有喺觀眾席拉起巨型橫額，答謝呢位多年來為國家隊鞠躬盡瘁嘅一代中場。現年34歲嘅史奈達𠵱家效力卡塔爾聯賽球隊艾加拉法，佢喺2003年四月首次替荷蘭披甲，至今喺國際賽替球隊上陣134場，入咗31球波，可惜同世盃冠軍緣慳一面。
