今屆捧完世盃嘅法國，喺後世盃時代第一場，着起兩星戰衣，禮拜四喺歐洲國家聯賽A1組首場比賽，雖然11個世盃決賽正選有10個繼續踢，但反而係靠唯一唔同嘅人——門將艾路拿喺下半場作出連番精采撲救，得以作客0:0守和德國。
屢救險球摸和德國
兩隊今場各有目標，德國自然希望忘記今夏世盃分組賽出局嘅噩夢，而兩星法國都唔想失威。賽前，足智彩嘅「讓球」盤，身為世盃冠軍嘅法國受讓平/半，再睇埋陣容法國出盡主力，前線繼續由基利安麥巴比、基沙文同基奧特合作，只係門將以聖日耳門後備門將艾路拿頂替受傷嘅隊長洛里斯把關，當然好似幾筍。
反而德國大變陣，以年輕人為主，排出四中堅防線，起用車路士嘅魯迪格同慕遜加柏嘅馬菲亞斯真達打閘，老將曉姆斯、謝路美保定打中堅；中場就推前甘美治，配合兩個新舊拜仁兵，卻奧斯同哥列斯卡組成三人中場，鋒線三人組就以馬高列奧斯作正箭頭，配合湯馬士梅拿、迪姆華拿攻堅。
聽日分組賽迎荷蘭
上半場，兩隊都係無咩具威脅嘅埋門，只以中場混戰居多。踢到18分鐘，先有第一腳中龍嘅埋門，係迪姆華拿右路起腳被艾路拿沒收；喺37分鐘，基奧特接應尼高路簡迪嘅傳中衝頂，但未能威脅紐亞；半場雙方踢成0:0。但係下半場法國陷入捱打局面，好彩有表現神勇嘅艾路拿，佢今場有六次撲救，尤其下半場面對馬高列奧斯勁射、曉姆斯門前混戰嘅窩利，都成功守住法國嘅大門。就算德國喺下半場中段換入根度簡同利萊辛尼，加強攻勢，但反而係法國嘅後備兵奧士文尼迪比利喺補時階段差啲入波，佢嘅射門省中對手改變方向，差少少就收死紐亞，兩隊最終互交白卷。
法國教練迪甘斯就話德國今仗鬥志較好：「今場波雙方實力接近，我哋犯咗唔少技術上錯誤，好彩球員體能狀態非常好，保得住和局。我哋原先目標係全取三分，不過德國今場明顯因為世盃嘅恥辱，鬥志反而更加高昂。」周日法國會繼續踢歐國聯，返主場鬥荷蘭，而德國就輪空，會喺賀芬咸主場友賽秘魯。