丹麥周三國際賽作客0:3不敵斯洛伐克，雖然只係友賽，但上陣嘅球員可能流到你唔信，國家隊成員竟然係由學生哥、建築工人、獄警同埋KOL等組成？
丹足總同國腳傾唔掂數
丹麥足總因贊助問題，未能同常規球員達成協議，結果呢場只能派出由低組別、室內五人足球員所組成嘅隊伍應戰，基斯甸艾歷臣等出名球員全部冇份踢。16名球員係首次為國家隊上陣，前鋒奧芬保正效力國內丙組球隊艾華達，佢亦係一位兼職售貨員；司職右閘嘅禾利臣就仍然係一位學生，目前效力國內第五級別聯賽球隊；至於本身係丹麥五人足球隊中場嘅拉斯姆斯祖漢臣就係丹麥丙組隊球員，佢同時係一位花式足球網紅，喺YouTube同ig都有近百萬名追隨者。做大國腳呢啲機會真係有今生冇來世，難怪成班球員喺賽前奏國歌嘅時候鬼咁開心。
吞斯洛伐克三蛋好驕傲
今場幫丹麥把關嘅基斯杜化海格，本身係一位室內五人足球守門員，佢今場正選把關，面對10次射門亦成功作出咗七次撲救。考慮到丹麥今仗只得27%控球率，而且斯洛伐克陣中有前利物浦中堅史卡迪爾同拿玻里中場咸錫等球星，呢隊「丹麥雜牌軍」今場嘅表現其實絕不失禮。
雖然作客斯洛伐克輸0:3，但奧芬保賽後話：「我哋至少可以有尊嚴咁離場，我哋喺冇退縮，對方唔係好壓倒我哋，我對此感到驕傲。」門將基斯杜化海格賽後就形容今場比賽係「瘋狂嘅經驗」，佢話：「呢個當然係非常奇怪嘅情況，但我一直都期待首次為國家隊上陣，我認為所有球員表現都好好。」
丹麥下周日會喺歐國聯首輪迎戰威爾斯，暫時未知呢支「替工隊」會唔會繼續踢，抑或常規球員同足總已經傾掂數。至於丹麥喺歐國聯嘅同組對手、愛爾蘭領隊奧尼爾就認為，歐洲足協應該要介入丹麥球員同足總之間嘅風波，因為事件可能會影響到愛爾蘭喺歐國聯小組嘅形勢發展。