近日大專院校嘅開學禮上，接連有學生代表講「獨」，令香港民族黨陳浩天喺香港外國記者會演講嘅「港獨」風波稍稍歇息後，再次升溫。港澳辦副主任黃柳權噚日喺北京指，香港將來就《基本法》23條立法時，要就港獨嘅言行分成唔同情況加以規範；有政界中人指，力迫特首林鄭月娥加快就23條立法嘅壓力越來越大，若稍後再爆港獨爭議，林鄭或難抵壓力，加速啟動立法。
中央或直接引入國安法
當陳浩天獲邀到FCC演講，唔少建制派好似「執到寶」咁，借勢促特區政府盡快就23條立法，但林鄭始終未有提出立法時間表，令「鷹」系建制派相當冇癮。但其後接連有子彈送畀建制派開火，由陳浩天向美國總統發信，再到近期開學禮風波，據知重振「鷹」系雄風，再逼立法之聲此起彼落。
政界一直流傳，林鄭預計到呢屆任期尾段先交出立法方向，連任後先正式立法，原意係喺首屆任期入面，以民生議題打好民意根基，盡力掃除立法阻礙。但港獨事態發展出乎佢意料，最近嘅校園播「獨」，據知北京認為上年已經發生同類事件，今年情況竟然未有遏止，相反更有擴散迹象，引來一股建制力量逼迫林鄭提早啟動立法；有藍絲陣營近日請願橫額寫明「從速二十三條立法 行政會議想辦法」，清晰可見矛頭所指。有建制派中人稱，目前最擔心係特區政府未立法前，中央已按捺不住直接引入內地國安法，填補香港國安方面的漏洞。認定此路不通？習權時代，仲有乜係冇可能？