北京同港府好落力催谷粵港澳大灣區發展規劃，講到有咗大灣區乜嘢社會政治經濟問題都可以解決，好似工聯會前榮譽會長、港區人大代表鄭耀棠前日話，大灣區連香港冇地起樓都可以解決，話只要向廣東省租地起條「香港村」，實行港式管理，叫晒班後生仔返去住咪掂！又可以畀當地人住夠7年變香港人！不過佢呢個咁偉大想法就俾網民狂踩，話又係中共吸香港政府儲備、為香港換血詭計。
「香港第19區」
鄭耀棠話房屋問題已經水浸眼眉，年輕人因冇樓怨政府，擔心有人借房屋供應短缺趁勢搞亂社會，所以佢建議配合大灣區發展，港府向廣東省租地，喺惠州、中山等地興建「港式新市鎮」，由港方管理同奉行香港法律和稅制，成為香港第19個區，佢提出向當地原居民提供搬遷補償，亦可考慮讓畀佢哋喺新市鎮居住，住滿7年就可以拎香港身份證做香港人，預料每個新市鎮可住50萬至60萬人！仲話已同娥特講咗，又計劃出年兩會期間提出議案。
呢個計劃聽落好似冇乜問題，不過香港班後生仔邊會咁易被人呃！八方睇各大論壇，班後生網民噓聲四起，有人話佢想用樓引班後生仔下放去大陸，等大陸整治佢哋；有人話香港租西部通道咁細嘅地方，一年成800萬租，𠵱家要租條香港村，分分鐘一年以百億計租金，十年八年咪吸乾香港儲備！仲有人問香港畀錢大陸租地方，再畀錢喺大陸建設，再派埋身份證畀大陸人，呢個係乜邏輯？
李八方