職業司機袁先生噚日晏晝兩點幾，揸重型貨車經過屯門公路，嗰度三線行車，車速限制係70公里，右邊進行緊工程有一行水馬攔住。袁先生沿住屯門公路快線向元朗公路方向行車嗰陣，佢見到前面架私家車，行行吓突然越嚟越貼右邊嘅水馬，跟住直情炒咗埋去，「砰」一聲水馬爆裂水花四濺，嚇到袁先生即刻扭軚避開，佢喺倒後鏡見到私家車司機曾經落車望一望，但之後佢開車走咗去。警方話噚日下晝2點48分收到附近工程人員報警，喺現場聽到「砰」一聲，發現大約50米長嘅水馬爛咗，架私家車就走咗去；差人將案件列作交通意外無人受傷及事後不顧而去，追緝緊司機。佢覺得路邊水馬有少少阻碇，令條行車線窄咗少少，但係工程需要佢都諒解，始終安全第一嘛。