「山神」變獨男！據英國《太陽報》報道，曼聯前鋒阿歷斯山齊士周三自爆同拍拖一年嘅女友美迪洛迪古絲分咗手！話說喺曼聯賺緊過50萬鎊周薪嘅山神，周三喺自己有成950萬follower嘅ig度，將自己同行埋咗一年嘅女友美迪洛迪古絲分手嘅消息公告天下。29歲嘅山神咁話：「我祝你永遠安好，可以遇到你仲同你一齊係最美好嘅事，但我哋決定要走自己嘅路，追尋各自嘅夢想。我以前唔會咁做，但我希望唔知內情嘅人可以尊重我哋，因為咁會影響到我哋嘅屋企人。」報道仲話，山神同美迪洛迪古絲分手都唔係突然發生嘅事，佢哋其實喺今年五月，已經將對方喺自己social media嘅相delete晒。唉，又睇吓受情傷嘅山神，幾時可以幫紅魔踢番好啲啦。