陳百強對香港樂壇影響極深，一班藝人多年來對Danny念念不忘，談到對Danny的印象，離不開斯文、有品味，當然還有他留下來的歌曲。
何超儀 契爺契女
何超儀從小視Danny契爺，有次被家姐超瓊鬧不懂打扮，Danny主動提出陪她到中環買衫：「我第一次演出，佢仲搵咗陳華幗做咗一套好靚嘅衫，所以我好錫呢個契爺。」
溫拿 自小相識
溫拿五子與Danny熟稔，鍾鎮濤母親更是Danny的契媽：「係正式上契，我哋細個已經識㗎喇，Danny最開始仲客串幫我哋彈風琴。佢最初頭作嘅《漣漪》，都有彈畀我聽。」譚詠麟則笑說：「最能夠代表Danny嘅歌應該係《一生何求》，健仔仲改歌詞變《一斤鵝頭》。」
露雲娜 好掛住你
露雲娜10多歲已認識Danny，她說：「除咗音樂，電影佢都鍾意，有時又會帶我去買靚衫，又成日請我食漢堡包，我想同佢講『Danny我好掛住你』。」
麥嘉 一粒巨星
麥嘉跟Danny在電影《聖誕快樂》合作，他說︰「佢離開呢個世界亦無憾，因為佢嘅劇本，要佢嚟呢個世界，就要光光彩彩。佢做完呢啲嘢，選擇呢個方式，離開呢個世界其實冇問題，好似移民火星咁，總之佢快樂就得，佢在天之靈，佢都係一粒星。」