建制派為咗催谷前食物及衞生局政治助理陳凱欣嘅知名度，除咗不惜工本大灑金錢宣傳外，又點少得蛇齋餅糭，但陳凱欣假假哋用九龍社團聯會「健康大使」名義宣傳，但如果用唔多健康嘅蛇齋餅糭益人，咁就真係有問題。
話說「小麗民主教室」嘅劉小麗周三fb上載一條片，係佢街頭「直擊」九龍社團聯會向街坊派單張，宣傳下星期舉辦嘅「中秋敬老茶聚」，仲寫明只要畀38元就能食到12道菜，包括有菜苗餃、燒賣、鮮竹牛肉球、麻蓉包、蒸鯪魚球同黃金糕6款點心，仲有貴妃雞、蝦球燴伊麵、焗龍脷柳魚球、咕嚕肉、魚湯浸菜心苗、荷葉炒飯6款主食，可以估到九龍社團聯會背後補貼幾多！
不過長者食個tea都12道菜，對身體就未必咁好，小麗亦忍唔住喺fb留言質疑，九龍社團聯會又話係健康大使，咁推崇下午茶豪飲豪食，似乎真係唔係幾好喎。八方問營養顧問李正雅，佢就直言睇個份量已多到當晚餐食都得，其中牛肉球、麻蓉包係點心界嘅高脂陷阱，而蝦球、龍脷柳魚球同樣油份多，伊麵用到嘅油等同公仔麵，即使每樣食一件，12道菜份量都已經好多，建議食完呢個tea，如果到夜晚肚餓，最好只食一份蔬菜同一份水果補充，以免吸收過多油份。