韓國型男鄭雨盛昨日與楊采妮（Charlie）在中環出席護膚品活動。鄭雨盛透過繙譯表示今日來港只是逗留一日，因為沒有機會四圍去，所以覺得很可惜，他表示：「我同好多韓國演員都一樣，都好鍾意香港，對香港有好特別嘅感情，因為大家都係睇香港電影長大嘅。」
Charlie目前正於台灣拍產後首齣電影，問到會否不捨得離開孖仔，她苦笑說：「都會㗎，接拍前我都考慮晒好多嘢，安排好晒，包括請埋保母照顧小朋友，因為孖仔都一歲半，可以自己食嘢，係最好玩嘅時候。我出發去拍戲前，已經日日同佢哋講，媽咪要去拍戲，媽咪要出去呀，雖然唔知佢哋明唔明白，但係呢都會繼續講。」幸好今次劇組安排得好，雖然Charlie今次要拍攝一個月，但會有空檔回家。
昨日出席活動前，Charlie已返過新加坡，陪小朋友去動物園玩，老公及孖仔更到機場接機，Charlie直言望到孖仔跑過嚟，已經感動到眼濕濕：「當時兩個小朋友見到我嘅時候，就好似小樹熊咁夾住我，我都好感動，哥哥就熱情，一嘢就衝過嚟，反而細佬就慢慢咁行過嚟，仲要我𠱁佢囉！」對於郭富城再有喜，Charlie笑言：「有個伴都係好事，因為城城好鍾意小朋友，同佢合作《父子》同《浮城》時，戲入面都有小朋友，見佢同小朋友都相處得好好，相信佢係一個好爸爸。」
採訪：曹家誠
攝影：陳慧安