英國報道指，英超賽會喺9月15日（下周六），五場喺英國時間下晝三點開賽嘅比賽試用VAR。到時比賽會照正常有VAR嘅賽事咁進行，但負責系統嘅旁證喺比賽進行期間，就唔會同球證有任何溝通。英國球會喺今年四月投票否決喺18/19球季於各個級別聯賽使用VAR，但季內仲有60場本土盃賽會用VAR。據報英超喺2019/20球季會全面使用VAR。
另外，歐洲頂級球會教練聯袂要求，歐洲足協重新審視喺歐洲球會賽事嘅作客入球條例。歐洲足協常務秘書長馬捷迪，周二喺瑞士同多位歐洲頂級球會教練開會後話：「佢哋認為今時今日喺作客比賽入波已經冇以前難，作客入球規例應被重新審視。」參加今次會議嘅領隊同教練（圖）包括摩連奴、艾馬利、艾基利、盧比迪古、安察洛堤同杜曹。除咗作客入球條例，佢哋亦提議歐洲球壇應仿效英超同意甲，喺新一季聯賽開始前就關閉夏季轉會窗，而且應該將轉會窗嘅關閉時間統一。