利物浦唔會入到英超前四！邊個咁大口氣？咪就係巴西前鋒尼馬囉。最近佢回應傳媒提問嘅時候，就話喺英超開季四戰全勝，家陣排榜首嘅利物浦，最後都係唔會贏到英超，而且排名仲會喺前四名之外。
呢位巴黎聖日耳門（PSG）嘅10號仔，近日喺巴塞隆拿出席撲克比賽活動時，接受英國傳媒訪問，就被問到點睇邊支球隊最後可以拎到英超冠軍，「呢個係個好難答嘅問題，非常難。不過我覺得曼城會贏冠軍，曼聯拎第二，第三名係車路士，第四名就係熱刺，無利物浦份。」睇嚟對於開季狀態唔錯嘅利記，呢位巴西射手好似唔放在眼內咁。之不過，尼馬效力嘅PSG，今季歐聯就抽中同利物浦一組，今個月18號就要作客晏菲路鬥紅軍，唔通係想喺賽前玩吓心理戰，擾亂對方軍心？
艾利臣繼續擔正
講到呢場歐聯分組賽，有報道就指利物浦領隊高路普唔會喺歐聯輪換門將，將會繼續以艾利臣比加擔正。上季高路普喺英超賽場，上半季主要都係用米洛列特，而歐聯賽場就會起用卡利奧斯，不過其後卡利奧斯就正式坐正，不論英超定係歐聯，佢都成為咗主力門將。而今季利物浦陣內，只係剩番艾利臣比加同埋米洛列特兩位門將，雖然上周六嘅英超，艾利臣比加就因為玩波失誤，令到球隊今季嘅清白之身被破，但高路普仍然投佢信任嘅一票，歐聯分組賽仍然會用呢位巴西門將打正選。
曼聯名單三右閘
而周二幾支有份打歐聯嘅英超球隊，都向歐洲足協遞交出戰歐聯嘅名單。其中近季都被紅軍外借嘅比利時前鋒奧歷治都有份進入利物浦大軍名單。曼城方面，正喺養傷當中嘅主將奇雲迪布尼都有份，而夏天差啲就離隊嘅烏克蘭小將辛真高都喺名單當中，但係受傷嘅門將哥迪奧巴禾就唔喺名單之上。至於紅魔鬼嘅後衞達美安近季多次傳出離隊，不過仍然留隊之下，令佢又有份出戰歐聯。而連同路爾斯華倫西亞同今季新加盟嘅達洛治，紅魔單係右閘就有三個。另外，今季由華倫西亞回歸嘅巴西中場安達斯彭利拿亦喺名單之中。