粵港澳大灣區規劃都吹咗幾個月，八方都好有興趣了解呢份規劃有乜咁巴閉，可惜一直只聞樓梯響。雖然規劃未出台，但正所謂快人一步，理想達到，有銀人士梗係早着先機去大灣區投資啦，八方自問未有咁嘅財力去大灣區投資，但政界、官場有銀者大有人在，八方想睇睇有幾多人身體力行去大灣區投資，戥人高興都好。
八方發現，除咗政府最高層特首林鄭月娥身體力行撐大灣區之外，班副局長同埋政助仲好支持㗎。
先睇吓上至特首林鄭月娥、下至三司13局嘅司局長，原來林鄭同政制局長聶德權有喺大灣區買樓，地點不約而同係中山。呢啲咪叫講得出、做得到囉！不過娥特個中山住宅唔係佢自己名，係佢先生林兆波名。而聶德權負責內地事務，佢同老婆喺中山有層樓之餘，老婆自己喺中山另外有層樓，認真畀面。
值得一提嘅係，以僭建聞名嘅律政司司長鄭若驊喺大灣區冇樓，之但係喺北京、雲南各有一層，都算係愛國愛港嘅。其他局長就曳曳啦，好多人冇喺內地買樓之餘，仲喺外國買咗樓，好似財爺陳茂波、環境局局長黃錦星、創科局長楊偉雄、公務員事務局長羅智光、食衞局長陳肇始同埋商經局長邱騰華。
副局政助好狼死
相比起嚟，班副局政助似乎仲有遠見。民政局政助黎穎瑜、財庫局副局陳浩濂，仲有發展局副局長廖振新，都喺大灣區買咗樓或者商業單位，夠晒眼光。
至於行會成員入面，身兼立法會議員、做廠出身嘅林健鋒，老早就投資咗大灣區，其他嘅鄉議局主席劉業強、羅范椒芬、林正財同前金管局總裁任志剛，亦都有樓喺大灣區，任總同娥特、聶德權一樣，又係揀番中山。
李八方