講完政府入面有幾多人去大灣區買樓，咁立法會議員又點？八方以為民主派立法會議員就唔使諗，點知八方一check，發現公民黨譚文豪竟然喺大灣區有樓！
譚文豪同八方講，佢喺惠州有樓，其實係早年買落，當時親友提起去惠州買樓，佢見樓價又唔貴，咪買嚟畀屋企人當作度假屋用，其實同大灣區冇乜關，亦唔會因樓價升拎嚟炒賣。
建制派方面，立會主席梁君彥、民建聯黃定光、蔣麗芸同梁志祥、經民聯石禮謙、張華峰、自由黨鍾國斌、實政圓桌田北辰，同埋無政黨嘅謝偉俊、馬逢國和姚思榮，佢哋都喺大陸有樓，部份冇寫明層樓喺大陸邊度，而梁志祥、石禮謙就寫明分別喺深圳和中山有樓。
不過比較特別係金融界陳振英，佢啱啱喺中山置業，仲講明因為大灣區規劃先買，陳振英話佢諗過㗎喇，中山位處大灣區中心，加上本身交通好，去其他8個內地城市或者港澳特區都好方便，此外中山市定位為休閒城市，相當宜居。將來大灣區發展起嚟，陳振英咪發達？咁又未必，佢解釋畀八方聽，內地賣樓限制多，兼且有資產增值稅，層樓自住好啲。睇嚟真係有心喺大灣區買樓，中山係唔錯嘅選擇喎。