英國報道指，英格蘭名宿碧咸因被控超速駕駛而面臨官司。不過，幫佢打官司嘅大狀費曼，喺英國素有「漏洞大王」之譽，專門搵法律漏洞，佢指當局向碧咸發出嘅告票，喺事發後第15日先送到，超出咗兩星期案件追溯期，所以冇任何法律效力，案件將喺本月27日呈堂。
另外，巴塞隆拿後衞碧基都係一個「馬路炸彈」，早喺上年佢就因超速被警察截停，上周五佢又被警察發現喺停牌期間無牌駕駛，可能會面臨最高六個月監禁。不過碧基似乎仲係「唔識死」，周一朝早雖然冇再揸私家車去練波，不過佢就騎咗部要成一萬歐元嘅電動單車，喺馬路同行人路之間飛馳。雖然話係電動「單車」，不過部車嘅性能都幾勁，最高時速可達每小時73公里，唔知碧基今次走法律罅又會唔會惹上麻煩？
