美國傳媒報道，巴塞隆拿將會係西甲史上首場海外賽事嘅其中一支球隊，據報呢支衞冕球隊將喺出年1月27日喺邁阿密鬥基羅納，呢場比賽將視為基羅納嘅「主場」賽事。西甲賽會上月同美國傳媒公司達成15年合作協議，將西甲賽事移師海外進行。雖然計劃受到西班牙球員工會強烈反對，但目前未有迹象顯示有關計劃會被擱置。西班牙傳媒周二報道，基羅納會向願意前往觀賽嘅季票持有者，提供1,500張免費機票。邁阿密距離基羅納7,500公里，航程需時九個半小時，所以其他唔願意去美國觀賽嘅季票持有者，將可換取一張喺9月23日基羅納作客魯營鬥巴塞嘅門票，同時獲得最少兩成嘅季票價錢回贈。據報基羅納喺呢場西甲海外賽，可賺取約400萬歐元（約3,637萬港元）。