巴西傳奇射手朗拿度周一亮相西甲球會華拉度列記者會，正式宣佈用3,000萬歐元（約2.7億港元），由該會主席卡路士蘇亞雷斯手上買入51%股份，成為大股東。不過「大哨」指蘇亞雷斯會留任主席，自己唔會爭位。周一大哨抵埗致辭嗰陣，市長普安堤都有親自迎接。
41歲嘅大哨上個月曾因為肺炎入廠，仲入埋深切治療部。今次佢表示會由專業人士管理球會：「我會以華拉度列嘅利益行先，管理方針會以四個形容詞概括：競爭力、進化、改革同社交，我希望唔使護級，而係可持續發展，我會邀請球迷一齊畀意見同批評，一齊支持球會。」
華拉度列今季重返西甲後，三輪聯賽只得兩和一負，一球不入，仲係近年西甲嘅「升降機」，近10年試過兩次降班，即使留得喺西甲，最高都係排喺第14位。
碧咸魔獸美國搞波
近年球圈都有唔少球星出錢出力搞波，當中92一代嘅「曼聯小福」，同「魔獸」杜奧巴亦有份。「萬人迷」碧咸喺美國邁阿密搞緊一支全新球隊；「曼聯小福」就喺2014年同林榮福合作收購咗當時喺英格蘭第六級聯賽嘅沙福特城；杜奧巴就係美國次級聯賽球隊鳳凰城嘅班主兼球員。
