不少男人都視愛車為「二奶」，係佢哋嘅命根，見到「二奶」有乜揩花擦傷仲心痛過自己受傷，如果見到「二奶」俾人一鎚一鎚咁扑落去喇喎……楊小姐噚日凌晨12點左右喺屯門黃金海岸酒店對開嘅公眾停車場攞車準備走人，離遠見到有個女人手執鎚仔，猛扑一架白色私家車，車窗玻璃應聲爆裂，清楚聽到碎片跌落地嘅聲音，楊小姐同行嘅男士都忍唔住講句：「仲使要嘅！」
楊小姐睇咗一陣，佢話個女人伸手入去打開司機位道門，防盜響起，佢繼續用鎚仔扑爛車廂入面嘅設備，防盜停咗一陣又再響，個女人企喺旁邊，然後又坐喺路邊，之後搭的士離開。幾分鐘之後，警車到場。楊小姐懷疑個女人受情傷打擊先會狠心洩憤。警方表示，接獲途人報案到場調查，接觸到姓林男車主，將案列作刑毀，追緝一名年約40歲女子。