趁馬季未開始，左丁山偷得幾日閒，又去曼谷hea夠兩三日。因時間關係，今次坐泰航，飛到曼谷後當地時間九點半（香港十點半），坐機場AOT汽車去酒店，半個鐘頭就到，晚上冇塞車就真係爽神啲嘅。
泰航商務艙只得十個乘客，有五個服務員行嚟行去，根本冇嘢好做，只係派餐之時叫做開工，可惜食物普通過普通，空中小姐殷勤送上開水，卻是香港街頭報攤賣得最平嘅Vita水，記得以前商務客位係供應Evian嘅，現在航空公司為咗節省成本，慳得就慳咯。在曼谷7-11，Evian（細樽裝）售42銖，即十元港紙，普通雜牌水每樽賣12銖（3港元），泰航都慳番三倍樽裝水費用㗎。
泰國機場輪椅供應無缺，工人大把，一字排開有十幾名中年以下男工等乘客落機，輪椅客好like！諗番在香港機場上機之時，泰航地勤人員話輪椅十五分鐘後到，點知等足半個鐘以上，推輪椅嗰位阿姐先至匆忙趕到。開工嘞，佢手機不停響起，好似係上司問佢行到邊度，又有其他柯打要佢接，香港機場啲人手短缺，早已不是新聞，因為失業率低到2.8%，搵工好易，好多人唔願意去機場返工推輪椅嘅啫。但根據泰國經濟數字，2018年7月，泰國失業率係1%，由2001年至2018年平均失業率係1.44%，即是人人有工做，點解機場又有咁多人肯推輪椅呢？真難解釋！
泰國人服務好過香港好多，工人足夠，又有禮貌，確係冇得彈。好似呢次入住「大倉威望酒店」（The Okura Prestige Hotel），位於Wireless Road（泰文係Witthayu Road），以前小Y Y住過，賓架H又極力推薦話好過Kempinski，於是唔再幫襯住慣嘅舊酒店嘞。大倉酒店有天橋連接往附近商場Wave Place，Central Embassy，再行過去Chidlom Central，落雨都冇有怕，實在方便得很。大倉屬新派酒店，服務優良，交通方便，去shopping容易，游水池又正斗，好地方也。可惜現在時興三結合，一座巨型大廈有齊寫字樓、酒店，與商場，每房設計難免不受到大廈寫字樓建築嘅限制。好似大倉咁，房間都唔細，但係好似唔夠地方用，茶杯要放在電視機旁邊，書枱冇櫃桶放置叉電器，WiFi蛋手機，都要擺滿枱上，廁所與浴室分開，浴室冇門，玻璃透明，兩人一間房，沖涼任睇唔嬲，或者年青男女鍾意啩，老嘢就覺得唔慣，廁所細到唔可以轉身，於是住咗一晚就懷念單幢酒店的設計（如舊四季、香格里拉、文華東方）。大倉啲早餐與日本餐又係差少少，未到五星酒店級，如果一家大細六七個人去曼谷旅行，還是住在舊派酒店更好，小孩子在大倉呢類新派酒店，根本無地方走動，實唔happy。