民協元老、前立法會議員馮檢基早前就宣佈退出有份創立嘅民協，另組壓力團體繼續議政。沉寂一排，阿基噚日向傳媒發出採訪通知，話希望就「近來嘅政治形勢舉行傳媒茶敍」，至於詳情係點就未有交代。面對九西補選逼近，「政壇李克勤」阿基喺𠵱個時間突然今日舉行茶敍，難免令人懷疑同參選有關。
其實傳咗退黨好耐嘅馮檢基今年七月正式退出民協，聲稱會另組壓力團體，但暫未公佈詳情。
之前兩次茶敍撻Q
好多人都關注佢未來會唔會以新組織嘅名義再參選，阿基多次面對記者時都未有正面回應，只係話自己未考慮選舉問題。事隔兩個月，阿基又再次蒲頭，究竟會唔會宣佈參選？各界引頸以待，阿基就連電話都無聽，短訊又無覆，唔知係唔係要等今日先一次過由佢老人家自己揭盅。
不過，八方都係勸大家對於今日有乜公佈唔好有太大期望，事關阿基之前兩次話搞茶敍都「撻Q」，聲稱「因故」取消，今日茶敍搞唔搞得成，都真係要到時先知喇！