區議會𠵱家一面倒染紅，明年改選相信以深水埗同沙田區戰況最激烈，皆因建制派只以一票之差保住過半數優勢。八方聽聞深水埗區除咗老樹盤根嘅民協，有意明年捲土重來，因為毛孟靜退黨而冇咗個九龍西直選議席嘅公民黨，都屯重兵派7人大軍喺深水埗搶灘，身兼執委嘅李俊晞及前執委陳宇明將會「打大佬」，分別挑戰深水埗區議會主席張永森及自由黨李梓敬。
為立法會選舉打好根基
地區樁腳重要是常識吧，八方向公民黨中人打聽過，2020年立法會選舉無論如何會派人出戰，但九西𠵱家只得富柏余德寶，同美孚中伍月蘭兩個區議員，真係勢孤力弱，所以計埋兩個現任，組織咗7個人強攻九西各區，包括法律界議員郭榮鏗助理伍僥敏落戶大角嘴櫻桃，九龍西支部秘書長溫仲然就出戰九龍塘，深水埗區更加係重點陣地，周琬雯同李俊晞分別出戰美孚南及美孚北。其中美孚北自94年開始成現任深水埗區會主席張永森囊中物，李俊晞上屆已經挑過機，惜以逾800票不敵，但有地區消息指，張永森前年大病或影響選情，有指張暫時仍有意競逐連任，近月揸枴杖都會繼續落區，亦冇潛在接班人伴隨。
公民黨地區作戰計劃另一個亮點係上屆曾經出戰藍田柏雅嘅IT界選委陳宇明，今屆會轉區迎戰自由黨李梓敬，區內不時見到陳嘅直幡掛喺李梓敬橫額附近，勢與李正面交鋒。之但係7個樁腳始終唔算多，余德寶就同八方講，𠵱家仲未截止黨內地區發展主任嘅申請，唔排除有再多啲人落場㗎。
李八方