小妖，9月7日你生日啦……
六十歲，走過一個甲子；莫論閣下是否在我們身邊，留下來的豐盛作品一直與我們同在，優惠了眾生耳朵與情緒，這個甲子人生過得很實在。
什麼冥壽、生忌、死忌等等字眼都討厭；生日便是生日，莫論此生還是往生。
落筆寫你很艱難，說熟絡？
成村人、尤其你班姊妹，人人爭認閨密第一號，各具獨門例子，證明與你更熟絡！
說不熟絡，又講不過去，在下「百強牌」獨門暗器，又點止幾把？
閣下確實稀有品種，吸引各路人馬另眼相看、呵護備至。
那年路經三藩市，投宿邁克家，見睡房一間，床一張……
邁老心思縝密，眼尾不用力掃過來，即刻回應：陳百強嚟住都係瞓埋一張床咋，唔啱擺杯水喺床中間啤？
即係話：紅到Danny Chan咁，一樣瞓埋同一張床，你老幾呀喂？
疊口連聲道謝：瞓、瞓、瞓！
記不起來有否擺杯水喺床中間。
那些年啊，你是如假包換賈寶玉；點止娛樂圈？華語歌曲所到之處盡是你的大觀園，才華出眾廿歲出頭已成名，又非梅愛芳梅艷芳姊妹自小跑碼頭荔園並港九新界一眾娛樂場所非人生活。你的獨家少年清純歌聲零污染。
台上如是。台下亦如是。
不似今天大紅、小紅、不紅不黑都有保母車、助手、頭髮、衣箱大大棚人前呼後擁。
你呢？
獨來獨往，到97餐廳、到Disco Disco打咭撐朋友，上落蘭桂坊都是一個人；你寂寞嗎？
我諗你寂寞，不是沒透露過，慣見鬧情緒，習以為常都以為發發少年脾氣，沒當真！
平常日子沒幾可見你騷大牌，人前人後：唔該、多謝、Thank You！
表裏一致，並非敷衍語。
人在做、天在看，你對人真，大家都看到；那年香港時裝節做五十個專業非專業男女老幼模特兒滙演大騷，整場表演由龔志成拉原創小提琴演奏音樂，並女高音演唱家梁小衛，舞蹈家梅卓燕負責聲樂；騷完，五、六十人白衫黑短裙謝幕，背景音樂播出閣下只此一家優秀《漣漪》，數不清多少人台上台下同時掉淚，大家都痛錫你、懷念你。
想你過得很好，那邊不用、也不會寂寞咯。