唔識國情點做建制派？所以民建聯同工聯會兩黨領導層都輪流北上研習，特首辦主任陳國基亦喺月中率領政治助理訪京一星期，而噚日中共中央書記處書記、中央統戰部部長尤權就接見咗民建聯訪京團，新華社報道話尤權提及中央高度重視香港，堅定支持香港繁榮發展，又大力推動香港融入國家發展大局。
「堅守初心 一以貫之」
講完大路嘢，少不免讚民建聯係香港愛國政團嘅一面旗幟，為香港平穩過渡、順利回歸同繁榮穩定作出重要貢獻，內容唔令人意外嘅，但及後有8粒字卻可圈可點。尤權話，希望民建聯「堅守初心、一以貫之」，繼續支持特首同特區政府依法施政。咁啱近期港獨爭議下，唔少民建聯中人都認為林鄭單係「譴責」唔多足夠，建制圈內怨氣唔少，難免令呢8粒字，特別令人覺得有意思。