球王美斯又創紀錄喇！周日西甲巴塞隆拿喺主場迎戰升班馬侯爾斯卡，雖然被對手先開紀錄，但其後有美斯同蘇亞雷斯分別梅開二度，下半場連轟五球下，以8:2大炒對手，開季三連勝。球王美斯喺今場波交出兩入球兩助攻，成為21世紀第一位球員可以喺西甲助攻數字達150次之餘，仲要喺西甲成功射破37個對手嘅大門，認真威水。
150次助攻西甲第一人
今仗比賽侯爾斯卡作客魯營，但一啲都無怯場，仲喺三分鐘就靠古曹靴南迪斯的頭槌領先。不過巴塞都即刻有回應，美斯同對手嘅烏龍波，旋即令巴塞反超前，隨後更有蘇亞雷斯嘅入波，拉開到3:1。但點知臨完半場前，侯爾卡斯再靠阿歷斯加拿嘅入球追近成2:3。呢個時候，相信一眾買咗巴塞[-3]嘅球迷應該都驚到震，不過下半場巴塞一口氣就攻入五球，最終以8:2大勝對手，繼續力壓死敵皇馬排喺榜首。
讓阿蘇射12碼顯無私
今場主角，絕對係新任巴塞隊長美斯，佢單單一場波就製造兩個紀錄。話說今季喺西甲競逐嘅20支球隊，除咗巴塞以外，就只有侯爾斯卡未被美斯射破過大門。不過，隨住美斯梅開二度，呢隊升班馬又立即成為球王腳下亡魂。其實美斯喺上季已經打破咗皇馬名將魯爾射破35隊西甲球隊大門嘅紀錄，今次美斯再將紀錄增加至37隊，的確厲害。
講完入波，又講下助攻。美斯今場比賽分別助攻拿傑迪錫同埋佐迪艾巴入波，交出兩次助攻之後，美斯喺西甲嘅累積助攻數字已經去到150次，成為踏入21世紀之後，首個可以助攻達150次嘅西甲球員。以歐洲五大聯賽現役球員嚟計，美斯都領導群雄，比第二位嘅法比加斯多出七次。至於美斯助攻受惠最多嘅球員係邊個？當然就係好拍檔蘇亞雷斯，150次入面就有23次係呢位烏拉圭射手受益。
雖然今場美斯無直接助攻畀阿蘇入波，但亦以行動助攻阿蘇。補時階段巴塞獲得一球12碼，美斯一向都係巴塞嘅首席劊子手，不過佢就讓咗畀阿蘇，幫對方提升信心，放棄上演帽子戲法嘅良機。呢個無私舉動就獲球迷大讚，話佢真係一個稱職嘅隊長同領袖。