近日中美貿易戰打到如火如荼，而且仲打到去鴨寮街？話說李卓人喺fb出咗個po，話去深水埗派單張，行到去鴨寮街嗰頭時，見到有小檔口賣玩具遙控飛機，冇拍攝功能100蚊、有就120蚊，阿人八卦問老細，點解呢啲遙控飛機賣得咁平？老細話批機本來出口去美國，但因為中美貿易戰賣唔到去美國，運返大陸又唔得，令到廠家企咗喺度，最後只好拎去鴨寮街散貨，希望可以執番多少。
有網民對該檔主說法唔多信，認為係marketing 招數，阿人都同八方話，最初佢亦半信半疑，因為貿易戰冇理由咁快打到玩具，但佢見到檔主嘅貨全部好似郵包咁，一件件用膠袋密封包好，似乎原本係準備寄去外國，檔主說法又未必完全係流料，至於係堅料定流料，阿人就話大家自己判斷。