天怒人怨，水浸，中港台三地無一倖免。台南高鐵站附近地陷，香港高鐵石崗站浸到傻。高鐵月底通車，網友躊躇問，每逢黃紅訊號，高鐵乘客係咪要自己執生？今次只是紅雨，未黑已經大浸，再來一場翻版天鴿的話，高鐵要停駛幾多日收拾爛攤？
浸到埋身的不單是暴雨，還有「中學教育課程指引」。教局學埋機管局路政署秘技，枱底密修，同行同檢？改咗囉不存在。沉降安全指標？私自下調到無人需要揹鑊的指數。教局對剛開學的中學示範開爐，將指引油浸，當中學生是雞，舊版指引說「學校不宜強加祖國情懷」，等於雞髀，斬走佢！舊版指引：培養學生成為「能批判、反思和獨立思考的人」，當係雞胸雞翼，斬埋佢！剩下來上碟的，是教局新增「能綜合發展和應用共通能力，成為獨立和自主的學習者，以利未來進修和工作。」喔，碟雞斬成咁，還有肉食？學生一啖咬下去，獨立自主那陣味，咁新界嘅？係咪浸死雞當走地雞？批判和獨立思考無得留低，在水深及胸的泥水中發展共通能力嗎？問吓高鐵，車廂滲水，路軌轉撤器壞埋，所謂一小時生活圈，係咪不利進修祖國情懷的低級笑話？