自從巴士藏針事件，小記呢排搭巴士，時刻都要打醒十二分精神，但冇針都唔一定可以安心坐足全程，好似讀者阿莊咁，前日搭27號線九巴嗰陣，就突然遇到巴士冒煙，嚇到走都走唔切，真係巧驚驚呀！
話說夜晚7點左右，阿莊喺旺角上咗架27號線九巴返順天邨，大約7點45分，仲有幾個站就到總站，但去到順利邨，突然有乘客大叫「嘩！好多煙呀！」打緊機嘅阿莊抬頭發現，車廂內滿佈濃煙，「都幾驚㗎，唔知會唔會着火！」由於阿莊坐咗喺上層中間位置，唔可以馬上衝落車，但喺排隊落車時，乘客一度爭先恐後，「有人大叫『唔好急，定啲嚟』」，最終乘客都安全落晒車，阿莊話，「我係最後幾個落車，個心係咁跳！」佢仲話，呢架車平時都爆晒，就算即將到總站，車上都仲有30、40人，如果人再多，爭落車時就真係好危險喇！
九巴回覆話，該27號線巴士喺利恆樓站畀所有乘客落車，再安排轉乘另一架巴士，過程順暢，無人受傷，而涉事九巴亦已返廠檢查。