今夏由史浩克加盟拜仁嘅哥列斯卡，喺德國盃及贏賀芬咸嘅德甲首輪賽事都係後備亮相，上周六作客史特加嘅第二輪德甲終正選上陣，並喺37分鐘接應湯馬士梅拿傳送再喺禁區邊緣射入，取得加盟拜仁後嘅首個入波，助球隊領先1:0。
換邊後，拜仁有阿拉巴喺49分鐘主射罰球中柱不入，但哥列斯卡喺62分鐘助攻畀羅拔利雲度夫斯基射成2:0，羅拔仔及後喺76分鐘後腳妙傳湯馬士梅拿，後者不負所託順利射入，協助拜仁以3:0大勝史特加。
爭取德甲七連霸嘅拜仁今季開季後兩戰全勝，並憑較佳得失球壓倒上周六作客以3:1擊敗利華古遜後，同樣係兩戰得六分嘅禾夫斯堡，喺聯賽榜領先。