今季季前意甲最大轉會，球王基斯坦奴朗拿度（C朗）以一億鎊轉會費由皇家馬德里轉投祖雲達斯，佢當然希望繼英超同西甲後再征服意甲，不過起步似乎有啲阻滯。祖記開季成績就冇得頂，上周六聯賽作客帕爾馬以2:1贏波，三戰全勝，但入波球員就繼續冇C朗份，暫時計數，C朗喺今季三場意甲合共23次射門一球都未入，效率係歐洲最差。
23次射門食白果
祖記作客帕爾開賽僅兩分鐘就由文迪蘇傑開紀錄，佢接應古達度傳送頭槌攻門，皮球先頂到對方球員背脊，之後自己再補射入網，幫祖記領先1:0。今季重返意甲嘅帕爾馬，喺33分鐘就由新加盟嘅謝雲奴扳平1:1。易邊後，文迪蘇傑再次搶鏡，佢喺58分鐘交出助攻，馬度迪接應近射破網，奠定2:1勝局。
33歲嘅C朗今場依然落力，全場八次射門但都未開到齋，今場最黃金嘅入波機會喺27分鐘，C朗接應貝拿迪斯治開嘅角球頭槌攻門，不過就僅僅斜出。C朗喺今季三場意甲全部踢足，270分鐘一共射門23次，依然未有波入。23射零入球亦係截至上周六比賽，歐洲五大聯賽進攻效率最差嘅數據。
小C朗仲威U9入四粒
喺歐洲五大聯賽，入球率0%嘅球員中以C朗射門之數最多，排第二嘅南特中場朗基亞已經比佢起腳少八次。之後排第三至五嘅分別係英超水晶宮嘅賓迪基、法甲蒙彼利埃嘅安迪迪洛特、同樣係法甲里昂嘅費基亞。其實C朗又唔使咁灰，佢上季初喺皇馬都喺西甲鬧入球荒，要射到第28次先有第一球，但埋單計數佢喺上季西甲上陣27場入成26球。
C朗未入波，但佢囝囝就已經爬咗佢頭，已經加入祖記青訓嘅小C朗，日前為祖雲達斯U9上陣，喺「地標」戰就入四球，領祖記U9以5:1大勝Lucento，真係虎父無犬子。
