上周六法甲有巴黎聖日耳門（PSG）作客升班馬尼姆，上半場36分鐘，尼馬接應梅尼亞右路地波傳中輕鬆破網，加上四分鐘後迪馬利亞角球直接彎入網，助PSG半場輕鬆領先2:0。
但係下半場尼姆還以顏色，先後喺63分鐘及71分鐘追成2:2平手；不過關鍵時刻基利安麥巴比挺身而出，喺77分鐘接應長傳利用速度殺入禁區狂抽破網，助PSG再次領先3:2，加上補時階段麥巴比美妙後腳助攻畀卡雲尼入波，助PSG4:2鎖定勝局取得法甲開季四連勝。但係球隊贏波功臣麥巴比，竟然喺比賽最後時刻因被對手踢跌，用雙手推跌對手報復，被球證用紅牌直接趕離場，不過踢跌麥巴比嘅對手亦同告紅牌離場。