馬季噚日開鑼，由特首林鄭月娥喺沙田馬場主持開鑼儀式並頒發特首盃，結果潘頓策騎告東尼馬房大熱「勝得威」贏出本季首項錦標，勝得威馬主係梁高美懿丈夫梁承達等人，前恒生一姐梁高賽後話好高興可以同孫仔一齊拉頭馬。
林鄭則喺主持開鑼後喺facebook發文，話今年已經係佢連續第7年主持馬季開鑼，所以佢同馬會董事兼行會成員廖長江都話自己係敲銅鑼嘅熟手技工，跟住嚟料話上屆政府5年間，傳統上呢個由特首出席嘅活動「因為種種原因」都由時任政務司司長嘅佢代勞，再話由特首親自頒發香港特區行政長官盃應該會比較親切，唔知一入馬場就被噓嘅前特首梁振英，係咪百般滋味在心頭？