皇家馬德里上周六迎戰雷加利斯，有門將泰拔高圖爾斯喺西甲正選「地標」。開賽17分鐘，加里夫巴利接應丹尼爾卡華積傳送後窩利領先。不過，雷加利斯喺24分鐘由古度卡里路主射12碼追平，兩隊半場踢成1:1。換邊後，賓施馬於48分鐘頭槌破網超前成2:1。61分鐘，賓施馬接應莫迪歷助攻射成3:1，呢球亦喺賓施馬近兩戰所入嘅第四球。五分鐘後，隊長沙治奧拉莫斯操刀射入12碼，皇馬結果以4:1大勝，西甲開季三戰全勝排喺榜首，但冇咗基斯坦奴朗拿度之後，入座率依然低迷，淨得73%。
至於同城死敵嘅馬德里體育會，上周六作客切爾達，喺46同52分鐘先後被麥斯高美斯同埋伊亞高艾斯巴斯攻破大門，以0:2不敵，喺西甲開季三戰僅獲一勝一和一負。教練施蒙尼賽後指自己要負全責，佢話：「完全係我嘅責任，因為我喺半場時唔確定下半場想要點做。」