《人民日報》作為中共中央機關報，對國家主席習近平歌功頌德一啲都唔令人意外，有時鞋油仲要落得好盡吓。好似噚日就創造歷史，單喺頭版「習近平」3字就出現咗45次，整份《人民日報》有103個「習近平」出現過。有網民對如此擦鞋手法不以為然，叫佢哋不如索性改名做「習報」。
證地位冇動搖
又講真，如果習大大唔喺官媒頻現身，反而更引人遐想噃！好似《人民日報》上月嘅頭版，因為喺9日、12日同15日都搵唔到任何習大大嘅新聞，引起內地同國際媒體關注，當時美國之音推測習大大嘅地位「可能發生動搖」，法國國際廣播電台（RFI）甚至認為有政變可能。
結果呢，習大大隨即喺上月16日「回歸」《人民日報》重要頭版位置，唔知噚日呢種擦鞋法，又有冇乜重要政治啟示？
李八方