做人逆流而上，叫堅持；揸車逆線而行，叫危險；堅持逆線行車，簡直係離晒譜！邊個咁過份，咪就係寶林呢個的士司機囉，入後波失敗，仲兩次嘗試轉入單程路，最終逆線行車，睇到都覺得牙煙！
讀者鄭先生噚日下晝1點幾，搭290線九巴去將軍澳，坐咗喺上層車頭位置，去到寶豐路同毓雅里交界，巴士司機突然響按，乘客先留意到前面架的士竟然入後波，嚇到巴士司機即刻呠佢，「好明顯佢想轉左入毓雅里，但過咗路口，想倒車但俾巴士頂住」。倒車唔成功，司機都冇打算兜個彎返轉頭，竟然駛前少少喺毓雅里駛出嘅單程路逆線而行，「佢之前試咗次，俾架車逼返佢出嚟，點知唔死心又試多次！」
終於畀佢逆線轉咗入毓雅里，當時同架私家車面對面，私家車後面又有架的士，所以私家車想走都走唔到，最後的士司機再次施展牙煙駕駛技術，喺私家車同安全島中間嘅窄縫穿過，呢吓神乎其技，途人都忍唔住望到實！「完全無視兩條線」鄭先生批評，的士司機又倒車又逆線，不顧其他車輛同途人嘅安全，做法非常自私！