C朗走咗，咁皇馬邊個會着佢件7號波衫？答案係馬里安奴。呢名皇馬青訓產品上季以800萬歐元轉投里昂，上陣45場射入21球，吸引到皇馬將佢回購，結果今個夏天就用3,000萬歐元將佢帶返巴拿比奴。𠵱家仲畀佢着7號波衫，睇嚟皇馬對佢真係寄予厚望。皇馬對上兩名7號仔都大有來頭，C朗就唔使講，再之前嘅7號仔係昔日「金童」魯爾。