全國政協副主席梁振英日前喺facebook再拎港獨問題攻擊港大法律系副教授戴耀廷，戴耀廷就反挑戰689，問佢有冇膽公開就佢自己提出嘅「理論港獨」嚟個大辯論，點知689變身鍵盤戰士喺戴耀廷fb留言，好似小學雞咁不斷問，「戴耀廷，再問一次，我反對港獨，你反對港獨嗎？另加問題：我反對台獨，你反對台獨嗎？」好多民主派人士睇完，都笑689轉移視線手法越嚟越冇水平。
沾沾自喜 指戴唔敢答
有民主派中人話，其實戴耀廷講過好多次佢反對港獨，就算佢噚日挑戰689篇文，都講明至今寫咗3篇討論港獨文章，但絕唔係用文章推動港獨，只係做分析，但689扮睇唔到咁，喺戴耀廷fb留言係咁問佢反唔反對港獨。
之後689再喺自己fb出文，沾沾自喜話自己逼戴表態，指戴唔敢答佢，仲上綱上線話咁樣說明戴耀廷一類人係港獨潛藏力量，「不肯明言反對港獨暴露了潛藏力量，以後沒有人可以再說：港獨只是陳浩天等力量薄弱的青年人的頑皮」。
另一民主派人士揶揄，之前港大法律學院首席講師張達明喺689 fb留言，質問佢為乜告鍾劍華及《立場新聞》誹謗，仲以法律上「公允評論」抗辯理由同689辯論，點知689答咗一次，張達明再追問，689已經唔答，改為去搞戴耀廷，擺明轉移視線，等人忘記佢冇答張達明質疑，但個手法真係做得太差。
李八方