四眼賊喺6個cctv監察之下，趁店員唔為意，快閃偷走西貢一間電器舖一把價值108蚊俗稱芭蕉扇嘅風扇仔。電器舖老闆仲擔心報警會毀佢前途，放佢一馬，原本只係打算將閉路電視片段畀屋企人睇，屋企人擺上fb提醒街坊提防賊人，揭露咗事件。
老闆冇報警 「唔想毀佢前途」
閉路電視片段有兩個角度，片段見到一個着黃色衫嘅四眼男，前日中午12點48分行經西貢一間電器舖，佢邊行邊望入舖內，行過咗之後迅速返轉頭，叉住腰企喺門口觀察咗5秒，然後行入舖頭再望，隨即快速伸出左手攞咗近門口右邊櫥櫃上面一把白色手提風扇仔，急急腳走咗。
事後電器舖老闆林先生同《蘋果》講，嗰日佢喺舖頭樓上貨倉收貨，店面得一個女職員，當時有其他客人，可能賊人吼女職員忙緊唔為意就落手。林先生忙到傍晚先落返店面，發覺近門口右手邊一個擺抽油煙機、煮食爐嘅櫥櫃，上面陳列嘅5把風扇仔少咗一把，嗰把風扇仔係新款、風力強、叉滿電可以用成10個鐘，佢問女同事又話冇人買過，於是睇返cctv就真相大白。
林先生話區內治安唔錯，只係大約10年前試過一次俾人偷嘢，嗰時電器舖門口擺放流動冷氣機、抽風機等貨品，懷疑賊人揸車犯案，掃走門口幾件貨。林先生仲話喺區內咁耐街坊都熟口熟面，而賊人生面口，估計佢唔係職業慣匪，可能只係壞習慣順手牽羊，所以林先生冇報警，驚會令到賊人冇晒前途。
其實電器舖入面裝咗6部cctv，林先生話因為舖頭4月新裝修，決定一次過做好所有嘢，聽取防盜公司建議，700呎舖頭裝6個鏡頭，個賊咁都睇唔到？林先生估計可能鏡頭同牆身天花顏色相近，唔覺眼。呢幾日雨水多，唔知冇擔遮嘅賊仔係咪想用把風扇仔吹乾個頭呢。
爆相爆片
#MeToo個個都要爆，但係唔一定要舉牌！只要你肯爆，無論好事、壞事、憤怒事，正嘢、衰嘢、古怪嘢，影低佢，《蘋果》幫你爆，更設爆相爆片大獎賞，除咗爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。