噚日凌晨1點鐘左右，落住毛毛雨嘅青衣街頭傳嚟夾雜粗口嘅爭執聲，引起住喺青衣邨嘅街坊喺窗邊望落街睇吓發生乜事，仲拍埋片畀《蘋果》。據嗰位街坊觀察，見到有兩班人喺青綠街偉景花園對開馬路推推撞撞，讓線後面停咗一架白色私家車，估計有人拍打私家車惹禍。
短片中見到兩班人估計一邊係車主，另一邊有4個人，車主見有人拍打佢架車，怒氣沖沖落車同對方理論，雙方大打出手，情況混亂，有兩個人疑受傷坐喺安全島，其間車主報警，又通知朋友嚟幫拖，揮拳打傷對家一個男人，佢慘被「兜槌窩面」失平衡跌落地，其間對家一個女人不停企喺雙方中間勸交，拉鋸一輪，警車嚟到。警方最後拉咗3男1女喺公眾地方打交，佢哋由34至45歲，分別報稱頭、手、腳、腰受傷，之後全部送院。