港鐵沙中綫醜聞連環爆，主事嘅運輸及房屋局局長陳帆拒絕問責下台，民望急插水，相反化身「鐵路大使」、頻頻狙擊甚至不時有料爆嘅實政圓桌立法會議員田北辰（圖）民望就創新高，建制派智庫嘅調查顯示，田二少評分上升0.13分至3.31分，創一年新高之餘，仲係40個地區直選同超級區議會議員中唯一評分過3分嘅議員，威水居榜首。
蔣麗芸容海恩包尾
香港研究協會本月1至28日，訪問1,099名18歲或以上市民，請佢哋為直選同超區議員評分，1分最低，5分最高，發現田二少評分上升至3.31分蟬聯新西榜首。評分結果一啲都唔出奇，事關訪問期間正值沙中綫工程搞到一鑊泡，二少幾乎日日蒲頭回應，為市民出咗口烏氣，如果港鐵同相關部門再龜縮，似乎「過3爆4」不是夢。
睇埋其他區，港島公民黨陳淑莊同九西毛孟靜就分別以2.85同2.71分保住該區第一位，九東謝偉俊同新東民主黨林卓廷分別以2.53同2.82分，取代公民黨譚文豪同楊岳橋排該區榜首。各區評分最差嘅分別係港島張國鈞、九東黃國健、九西蔣麗芸、新東容海恩同新西鄭松泰。