仲有個幾月，特首林鄭月娥（圖）就要交第二份功課——施政報告。噚日佢就閉門諮詢咗一班全國政協委員，據聞唔少政協都係主力講房屋、土地、經濟呢啲民生問題，港獨同23條都有講嘅，不過唔多囉。
講起房屋，八方聽聞全國政協常委、長和主席李澤鉅席間話有時因為政府嘅招標限制，搞到發展商要起啲大單位，如果可以喺數目限制上放寬，咁供應咪多啲，據知此時林鄭帶笑反問：「咁係咪要起多啲納米樓？」唔少在場人士當場「叮」一聲。
而聽到林鄭咁問嘅李澤鉅，據聞即時澄清話唔係，舉例指有時喺限制下要起800、900呎嘅大單位，但如果放寬咗咪可以起細啲好似400、500呎，啱香港一般家庭用，據知佢仲話覺得納米樓過量喎。